Os últimos acontecementos sociais demostraron que a educación emocional é tan fundamental para o desenvolvemento como a formación intelectual e física. Por iso, desde Afundación presentamos un programa orientado a dotar os máis novos de ferramentas para comprenderse mellor e entender a súa contorna.
Aínda que moitas veces nin sequera nos decatemos, boa parte do traballo das persoas artistas consiste xustamente nisto: enfrontarnos ás nosas propias emocións para, a través do proceso creativo, atopar a maneira de darlles forma. Ás veces trátase de manifestar aquilo que nos fai sentirnos vivos; outras, de plantarlle cara a aquilo que nos atemoriza. Pero sempre comunicándonos, xa sexa coas persoas que nos rodean ou, moi especialmente, con nós mesmos. Sen medo. Con liberdade.
Ao longo de xa case tres décadas, Pedro Feijoo desenvolveu unha intensa carreira como creador, primeiro no campo da música e, posteriormente, no da literatura. E será precisamente de toda esa experiencia da que os participantes neste obradoiro se valerán para atopar a maneira de dar forma a todas esas emocións. Tocando, escribindo, lendo ou compoñendo, aprenderemos a canalizalas para convertelas en algo novo: unha creación comunicable e visible, tanto para os demais como, sobre todo, para nós.
A actividade desenvólvese en 3 sesións de 1 hora, dúas nunha semana e unha na seguinte.
A actividade require un mínimo de 40 e un máximo de 50-75 escolares.
