Os acontecementos sociais demostran que, máis alá da formación intelectual e física, a educación emocional é fundamental para o desenvolvemento. A atención ás competencias emocionais revelouse na actualidade como unha necesidade á que se enfrontan escolares, profesorado e familias.
Co obxectivo de dotar de ferramentas ás persoas máis novas que lles axuden a comprender mellor os seus sentimentos e o seu contorno social, presentamos un programa específico orientado á saúde emocional con conferencias e obradoiros.
Fuco Reyes e a súa lente serán para estes e estas escolares o espello das súas emocións. Psicólogo e fotógrafo, con esta actividade Fuco explora aspectos clave na etapa da adolescencia como a construción da identidade, a autoimaxe, a autoestima, a xestión das emocións e a motivación. Procesos determinantes no desenvolvemento persoal e na aprendizaxe sobre un e unha mesma e as relacións coas demais persoas.
