O aumento da esperanza de vida é unha das transformacións sociais máis importantes do último século, e constitúe un reflexo da mellora continuada nas condicións sanitarias, económicas e sociais.
A nosa sociedade é cada vez máis multixeracional e lonxeva, pero a fragmentación por idades segue a ser unha característica da mesma, existindo moi poucas oportunidades para o diálogo e a colaboración entre persoas de distintas xeracións fóra do ámbito familiar. Por iso, en Afundación Obra Social ABANCA, a través do programa «O valor da experiencia» favorecemos espazos de encontro e de diálogo entre maiores e mocidade para fomentar a interacción, o entendemento, o intercambio de coñecementos e experiencias que contribúan a reverter o idadismo e os estereotipos negativos sobre o envellecemento e, así, contribuír a unha sociedade máis cohesionada.
Diálogo interxeracional, superación, adaptación, debate, emigración galega.
As historias de vida das persoas maiores na emigración son o eixe do programa, articulado a través de dous encontros nos centros de secundaria, que veñen precedidos dun traballo preparatorio apoiado en material e recursos didácticos. Maiores e estudantes comparten experiencias, reflexións e emocións, establecendo relacións baseadas no respecto mutuo.
Para o estudantado supón a oportunidade de coñecer a historia da emigración da man dos e das súas protagonistas e de aprender valores de emprendemento, esforzo, superación e adaptación; para as persoas maiores que participan como voluntarias da iniciativa, sentírense escoitadas, útiles e recoñecidas; e para a comunidade educativa en xeral, poder experimentar con novas modalidades de aprendizaxe non formal.