Diferentes actividades culturais impartidas por monitores con diversidade funcional, completan un programa para todos os centros escolares de Galicia onde o alumnado participa do valor da diversidade como elemento de enriquecemento social e persoal.
É clave que desde a infancia se entenda a diversidade funcional coma unha invitación a comunicarse, a aprender e a medrar. Unha proposta anovadora que elimina barreiras e achega valores coma o esforzo, a empatía, a aceptación da diferenza, a autoestima ou o respecto, ademais de incidir na sensibilidade afectiva e emocional, favorecer unha sociedade equitativa, xusta e diversa e facilitar as relacións interpersoais.
OBRADOIROS
Infantil e 1º de Primaria
CONTACONTOS «A FAMILIA». Conto teatralizado, creado pola Fundación Igual Arte, sobre as diferentes familias coas que nos podemos atopar (monoparentais, numerosas, con dous pais, con dúas nais, etc.). O conto dá pé á actividade «Creando a miña familia» coa que, por grupos, as e os nenos debuxan as persoas que conforman unha familia, uníndoas todas para crear un móbil colgante.
2º, 3º e 4º de Primaria
«AS TAREFAS DO FOGAR, ENTRE TODAS E TODOS». Obra de teatro con moito humor para comprender e aprender rindo que a igualdade de xénero é cousa seria. Un espectáculo no que o público ten un gran protagonismo, podendo participar en diferentes ocasións do espectáculo.
Duración: 45/50 minutos
Idioma: Castelán/galego
5º e 6º de Primaria
OBRADOIRO DE PERCUSIÓN. Despois de dar un pequeno concerto, as e os monitores deste divertido obradoiro ofrécennos unha serie de pautas sobre percusión corporal e sobre percusión con instrumentos, ademais de realizar estes últimos con materiais reciclados.
ESO
PROXECCIÓN. Curtas sobre inclusividade, realizadas pola Fundación Igual Arte.
- «Con lupa»: Unha historia cotiá e íntima, construída sobre os xestos e o silencio, ou dito con máis precisión, sobre os silencios. Preséntase un catálogo de olladas que revelan a incomodidade de cada situación descrita, mostrando os noso prexuízos e medos.
- «Por iso»: Narra a historia dunha moza con diversidade funcional que ten a inquedanza de prolongar os seus estudos e acode a inscribirse nun ciclo medio. Porén, cando chega á secretaría do centro educativo atópase con barreiras inesperadas. Esta curtametraxe trata de reivindicar a igualdade de oportunidades educativas.
Unha vez realizado o visionado, ábrese un pequeno debate con algúns dos actores e actrices participantes sobre as mensaxes ou as reflexións extraídas de cada curta.
