Afundación, Obra Social ABANCA cumprimos 10 anos como un dos axentes máis destacados da vida cultural e social de Galicia. Sendo a Colección de arte de Afundación un dos principais eixos de divulgación da cultura galega, este outono, presentamos SIMULTÁNEA, un macro proxecto que implica á Colección nas súas 7 cidades a través de 7 exposicións que contan con actividades escolares para todas as idades, e onde a arte e a historia, a programación e a robótica, así como a creatividade e a sustentabilidade son algúns dos ingredientes principais.
A Colección de Arte Afundación posúe, entre os seus tesouros, unha ampla variedade de artistas que foron abríndose camiño na linguaxe abstracta. Artistas cunha vinculación a Galicia que nos dá a oportunidade de relatar como e de que xeito a arte galega se foi aproximando a unha das linguaxes máis anovadoras do século XX.
Enfrontarnos ás aprehensións que xera o universo creativo da abstracción é un dos obxectivos do programa educativo desta mostra onde combinamos arte, programación e robótica, con creatividade e sostibilidade:
- Infantil a 4º Primaria | Visita-conto con obradoiro | Un ring para Yin e Yang
- 5º Primaria a 2º ESO | Visita guiada adaptada con obradoiro | Independent Art
- 3º e 4º ESO, bacharelato e CF | Visita comentada con obradoiro opcional | Simultánea. Abstraccións e mensaxes cifradas na Colección de Arte Afundación
