«Música a flor de pel» é un concerto didáctico impartido no propio centro educativo e deseñado especificamente para centros de Educación especial. A música convértese aquí nunha canle de comunicación e nun estímulo para o desenvolvemento emocional, afectivo, sensorial e perceptivo do alumnado: favorece a atención, reduce a ansiedade e facilita as relacións, nunha xornada festiva e emotiva adaptada a cada grupo.
Os centros de Educación especial recibirán unha chamada para anotarse á actividade.
O programa ofrece dúas propostas:
Fundación Igual Arte
Entidade sen ánimo de lucro que traballa a arte con persoas con discapacidade, entendéndoa como un dereito de todas e todos. Propón tres formatos, a elixir un:
- De tapas: concerto de música tradicional que combina xogos e interacción co público.
- Lavanda: proposta musical infantil con cancións coñecidas (de circo, de debuxos animados, tradicionais) para relacionarse e xogar cos seus personaxes.
- Música con Sentido: experiencia sensorial que combina música, son, texturas e materiais para traballar a percepción auditiva.
Xoán Curiel e Diana González
Unha actividade-experiencia para escoitar cancións compostas por Xoán Curiel no ámbito das músicas do mundo: reggae, pop, rock, música tradicional etc. O artista e a actriz Diana González crean toda unha experiencia en directo onde aprender algúns ritmos e sons, utilizando elementos teatrais, de narración oral e puntualmente de clown.
Ambos os dous contan cunha ampla traxectoria docente e unha sólida experiencia no traballo con persoas con diversidade funcional. Xoán Curiel impartiu clases de teatro, expresión corporal e voz a colectivos diversos, incluídas persoas con diversidade funcional en asociacións como FADEMGA. Diana González, diplomada en Pedagoxía Terapéutica e actriz, traballou como monitora de persoas con diversidade funcional e como profesora de teatro en proxectos de inclusión.
